ភ្នំពេញ៖ ប្រធានមន្ទីរទេសចរណ៍រាជធានីភ្នំពេញ លោក ម៉ម វាសនា បានបញ្ជាក់ប្រាប់ EAC news ថា កាលពីថ្ងៃទី១៧ ខែមេសា ដែលជាថ្ងៃចប់ចូលឆ្នាំទៅហើយ ប៉ុន្តែនៅតែមានពលរដ្ឋជាច្រើនកុះករបានបន្តមកកម្សាន្តលេងបាញ់ទឹក និងបាតម្សៅ នៅរមណីយដ្ឋានប្រវត្តិសាស្ត្រវត្តភ្នំ។

ដោយចូលឆ្នាំខ្មែរឆ្នាំនេះ រដ្ឋបាលរាជធានីភ្នំពេញបានរៀបចំ និងតុបតែងភ្លើងលម្អដ៏ស្រស់ស្អាត បានរុញឱ្យពលរដ្ឋជាច្រើនកុះករមកកម្សាន្តលេងមិនចាញ់ផ្សាររាត្រី Pubstreet នៅខេត្តសៀមរាបឡើយ។ សង្រ្កាន្តវត្តភ្នំឆ្នាំនេះទាក់ទាញភ្ញៀវទេសចរជាតិ-អន្តរជាតិប្រមាណ ១លាននាក់ គឺមានការកើនឡើងបើធៀបនឹងសង្រ្កាន្តវត្តភ្នំឆ្នាំកន្លងៗទៅ។

លោកប្រធានមន្ទីរទេសចរណ៍រាជធានីភ្នំពេញ បានអះអាងថា ការកើនឡើងភ្ញៀវទេសចរ គឺដោយសារតែឆ្នាំនេះ រដ្ឋបាលរាជធានីភ្នំពេញបានរៀបចំ និងតុបតែងលម្អដោយភ្លើងពណ៌ស្រស់ស្អាត។ លោកនិយាយដូច្នេះថា៖ «រមណីយដ្ឋានវត្តភ្នំ បរិយាកាសល្អ មានដើឈើរម្លប់ត្រឈឹងត្រឈៃ មានការតុបតែងលម្អដោយភ្លើងព័ណ មានការប្រគំឥន្រ្តី មានលេងល្បែងប្រជាប្រិយ៍ជាច្រើន ជាចំណុចកណ្តាលនៃរាជធានី ពិសេសគឺកត្តាសុខសន្តិភាព ភាពរីកចំរើនគ្រប់វិស័យ»៕